1 2 3 4 5 6 7 8 9 10 11 12 13 14 15 16 17 18 19 20 21 22 23 24
Ijesu Che Ipita Bi Ivbi Izẹbedi
5:1 Ẹghẹna ọ ruain khi enibi eni eọha da si mama Ijesu ni nain da daehọ ghi eta ghi Oisẹlẹbua, khi ọ rivbi ẹrae ghi Igenezarẹt.
5:2 Ọ min okọ eva ni nain rivbi okhẹe ẹrae. Enọ gbehẹn dianre vbẹkẹ ọe, nan kpe ighan nain.
5:3 Ijesu da ovbi ọkpa vbi eni okọ, nọ u oghi Isaimọn, ọ rẹ nọin tu ọe kere kpavbi ikiki re ovbi ẹkẹ ame. Nọ ki da deha, ọ da ma eni eọha davbi ẹkẹ ọni okọ.
5:4 Bi ọ ki rẹ teta e, ọ ta min Isaimọn, “Tu okọ we ri ehe nodimin nu fi ighan wẹ hivbi ame nu da mun ehẹn.”
5:5 Isaimọn anjẹn, ọ rẹ, “Ọdafẹn, dọnọnasọn re ni main da bia main mun emiọso, sokpẹn vbọhiọ ghi eta wẹ, mio fi ighan fiọ vbi ame.”
5:6 Bi nain ki rẹ u ọna, nain sikoko evba ehẹn nọ bun nọ gbai, ighan nain da guọghọ a.
5:7 Ni nain ki da ri obọ che eni nain rivbi okọ liọ ni nain da vae kpa nain obọ. Nain vae re ri ehẹn vọn eni okọ, sẹvbọ khi min nain kia hao.
5:8 Sokpẹn bi Isaimọn Ipita, rẹ daghọe, ọ dere vbi iguẹ ghi Ijesu, ọ rẹ, “Kpavbi ehe ni ri re, vbọhiọ ọlọkhọọ ni u, Ebiain.”
5:9 Ọhiọ mọn yain unuan, bi ẹnọ rivbọ deba e vbi eheni, vbọhiọ ghi ehẹn ninain gbe.
5:10 Ena nikhi Ijems bi Ijọn, ivbi Izẹbede, ninain bi Isaimọn ọgba bia. Ijesu ta ma Isaimọn, “Khai ki lofẹn, vbọhiọ davbi ẹghẹna kha shan, eọha nu kuo kha hiẹ.”
5:11 Bi nain ki rẹ mun okọ nain si ikiki, nain zẹ emi erẹmẹn obọ nain da rẹkhain.
Ọkhọmitẹn Min Imuegbedaan
5:12 Ọ da ruain khi bi ọ rẹ rivbi ẹvboo ọkpa, ọmọhe ọkpa ni itẹn vọin vbi egbe da rivbi eheni. Bi ọ ki rẹ daghe Ijesu, ọ de saẹoru, ọ da doabọ nain, ọ rẹ, “Ebiain, u kha hoo, muo meti khuẹ mẹn fuan.”
5:13 Ni Ijesu da niẹn obọ a re so ọe, ọ rẹ, “I hoo. Fuan.” Isọkpisọkpani itẹn ni da kpavbi egbe ghọe re.
5:14 Ọ vbuọe ude nọ khai ta ma uanso, sokpẹn ọ ta main, “Kha shan vbi ukpodẹ wẹ, nu ri egbe wẹ ma ohẹn nu u iuọbo ghi akhuẹfuan wẹ, zẹn enibi Imosis he yi iyi rẹ ji irọsẹe nain.”
5:15 Sokpẹn ikekezi ghọe da totobọ kha gẹn ọvbọ, obuyọ ghi agbọn da sikoko ni nain da họn amama ghọe, bi nọ da mun nain egbedaan vbi emianmi ọdọdan ghonain.
5:16 Sokpẹn mọn ghe ri ehe nọ fiegbea o lerọnmọn.
Obia Ghi Adiuduan
5:17 Ọ ki da ruan khi ẹdẹ ọkpa bi ọ ria ma agbọn emi, evba Ifarisi bi ẹnọma ghi uhi deha vbi eheni ni nain davbi igue ọdọdan vbi ilẹga ghi Igalili bi Ijudea vae, bi vbẹkẹ ẹvboo ghi Ijerusalẹm. Itotomi ghi Ebiain ghi amuegbedaan ri ọe vbi egbe.
5:18 Ẹghẹna imọhe eso vae, ni nain ri ewa mun ọmọhe ọkpa ni ọọ gbọe egbe, nain kaoghe enibi nain hio meti muọin ore di otọe vbi odao ghi Ijesu.
5:19 Nain min ukpodẹ rẹ muọin ore vbọhiọ ghi obuyọ ghi eọha, ni nain da hẹn okhumu oa davbi ẹvbọ mun ọni ọmọhe shan okhumu abii di otọe, bi ewa ghọe, hivbi esesẹ ghi agbọn vbi odao ghi Ijesu.
5:20 Bi Ijesu ki rẹ min adiuduan ghonain, ọ rẹ, “Ọmọhe, a ri ọkhọọ wẹ họnmẹn.” Evba ivinebe bi Ifarisi da sobọ khi nan miẹn amiẹn, khi “Ọni khọna nọ teta azọhan?
5:21 Ọnọ meti ri ọkhọọ họnmuan si ọi u Oisẹlẹbua ọkpa?”
5:22 Sokpẹn Ijesu, bọ ki rẹ ẹn vbi udu ghọe ebi nan oo, ọ rẹ nain, “Bọzẹe ni vba da miẹn ena vbi udu vba?
5:23 Da ọnọ huọlẹ nan da ta, ‘A ri ọkhọọ wẹ họnmẹn’ da nain ta, ‘Kpare muzẹ nu kha shan?’
5:24 Sokpẹn ni vba da ẹn khi Ovbi Ọọha mọin iyi vbi otọe agbọn nọ rio ri ọkhọọ họnmuan, i ta ma ẹn, ‘Kpare muzẹ, mun ewa wẹ, nu kha shan vbi oa wẹ. ‘”
5:25 Isọkpisọkpani, ọ kpare vbi odao ghonain ọ mun ewa nọ rẹ mẹhẹn. Ọ da shan vbi oa ghọe, ọ ri ire ni Oisẹlẹbua.
5:26 Agbọn erẹmẹn yunuan nan re Oisẹlẹbua. Ofẹn vọ nain vbi udu, nain rẹ, “Main min ebaisẹ miẹnghe ọdọdan ẹdẹnẹẹe.”
Ichemi Ghi Ilẹvae
5:27 Bi eni emina ki rẹ ruain, Ijesu kpavbi eheni re, ọ da min ọnọ miele eghuhọnmọn nan chọe Ilẹvae, ọ dehae vbi ase ghi enọ miele eghuhọnmọn. Ọ ta main, “Rẹkhan mẹn.”
5:28 Ni Ilẹvae da kpare kha rẹkhain, ọ zẹ emi erẹmẹn obọ.
5:29 Ni Ilẹvae da yẹn okpe ebae rẹ ghae Ijesu vbi oa ghọe. Enọ miele eghuhọnmọn ni bun rivbi eheni, bi eọha evbẹhe ni nain vae re deba nain kha e ebae.
5:30 Sokpẹn evba Ifarisi bi ivinebe ghonain da zuyọn ma ivbiehinmin ghọe, nain rẹ, “Bọzẹe niṣvba da e bi vba ọn bi ẹnọ miele eghuhọnmọn bi eọha evbehe ni nan u ọkhọọ?”
5:31 Ijesu anjẹn nain, “Eọha ni egbedaain nain hoo ọbo, sokpẹn enọ khọmọn.
5:32 I vae ni da che ẹnọ uata ji ioẹkẹedeluẹn, sokpẹn ni da che enọ u ọkhọọ ji ioẹkẹedeluẹn.”
Min Nan Gbẹkẹohanmi
5:33 Nain da ta main, “Ẹghẹn eremẹn ni ivbiehinmin ghi Ijọn ria gbẹkẹohanmi nan gbo lerọnmọn, bi ivbiehinmin ghi evba Ifarisi min nan gbo u iyọ. Sokpẹn ivbiehinmin wẹ min nan e nan ọn.”
5:34 Ijesu da ta ma nain, “Min uan ọ meti mun enọ ghaere vbi ehe nan da rie okhuoho gbẹkẹohanmi ẹghẹni ọdeghayo rẹ rivbọ deba nain?
5:35 Sokpẹn eni ikpẹdẹ mọn sẹ nan da mun ọdeghayo kpare vbi eheni nain ri re,, vbi eni ikpẹdẹ ni, min nan gbẹkẹohanmi.”
5:36 Ni Ijesu da gbo fi evbee ji nain, “Ai min uan nọ sọ ukpọn kpavbi evbu nọgbọn re nọ rọe so evbu nutẹ. Ọ kha u iyọ, mọ sọ evbu nọgbọn a, esọn ukpọn ghi evbu nọgbọn ọ ria eọvbọ ẹvbu nutẹ.
5:37 Ai min ọnọ ku ẹyọn nọgbọn hivbi ohian ẹyọn nutẹ. Ọ kha u iyọ, ọni ẹyọ nọgbọn mọn gbe ohian a, min ẹyọn ọ ku kua, ohian ẹyọn mọn ria.
5:38 Sokpẹn mọn eọvbọ nan ku ẹyọ nọgbọn hivbi ohian nọgbọn.
5:39 Ai min uan nọ da ẹyọn nutẹ, nọ che kha hoo ẹyọn nọgbọn ọhiọ mọn ta, ‘Ọnutẹ nọ họnmọn lẹ. ‘”