1 2 3 4 5 6 7 8 9 10 11 12 13 14 15 16
Ohan Ghi Atakpotọe Bi Uro Ghi Etin
14:1 Lẹkhu ihọnmẹkẹe bi nu gbo mọn ozaza ọhiọ ghi ohan ghi etin, ọmọmọn nu da kha ta atakpotọe.
14:2 Ọhiọ ọnọ zẹ uro etin ọi teta ma eọha si ọi u rẹ ji Oisẹlẹbua. Ọhiọ uan i rivbọ nọ ẹn emi nọ ta erimidi emi ihegbe ghi Etin nọ ta.
14:3 Sokpẹn uan nọ ta atakpotọe, eọha nọ teta ma nọ da khua nain re, nọ da rie nain akhaa, ọ gbo so nain udu.
14:4 Uan nọ zẹ uro etin mọn khua egbọe re, sokpẹn ọnọ ta atakpotọe mọn khua ọsẹ re.
14:5 Ẹghẹna min hoo ni vbavba erẹmẹn kha zẹ uro etin. Sokpẹn nọ lẹ iyọ achẹ, i hoo ni vba kha ta atakpotọe. Ọnọ ta atakpotọe no khualẹ ọnọ zẹ uro etin ọdọdan (si ọi u khi uan miuro nain nan da gare khi a khua ọsẹ re).
14:6 Sokpẹn ẹghẹna, imiọn, i kha bu vba re ni kha zẹ uro etin ọdọdan, da ee ni o u ji vba? I rio meti, si ọi u khi i teta ma vba rẹshin arẹma da iẹnmi da atakpotọe da amamemi
14:7 Emi nan we nọin mọn ẹwẹn agbọn kha khuee — enibi ifee da afan — khi nan poyeghe ọdọdan dianre, bi uan kio meti ẹn emi ni ifee da afan ọ khue dianre?
14:8 A kha fi ikakaki vbi ikhuemi nain ẹn, bi uan kio meti muegbe si ẹghẹ ghi osho sẹ e?
14:9 Iyọ ọ gbo ji vba. Si vba teta nọin mun uanso ẹokuere, bi uan kio meti mọn amuẹokuere ghi emi ni vba tae? Min vba kha teta, bi ai min uanso nọ muọin ẹokuere emi ni vba ta.
14:10 Vbẹkẹ aizudueva, uro nọ bun ọdọdan nọ rivbi otọe agbọn, bi ai min ọnọin mọn azẹo.
14:11 Sokpẹn si i ẹn azẹo ghi uro, mio kiẹn ọre ji ọnọ zọe, bi ọnọzọe o gbo kiẹn ọre ji mẹn.
14:12 Iyọ ọ gbo ji vba. Bi a rẹ gare khi vba vọn ji idaehọ ghi aregbema ghi obia ghi Etin, ni vba vọn ji ozaza ghi nan kha khua ọsẹ re.
14:13 Ọhiọghọna, ọnọ zẹ uro etin nọ lerọnmọn nọ da meti miuro.
14:14 I kha lerọmọn vbi uro ghi etin, etin mẹn nọ lọe, sokpẹn udu mẹn ọi mọn imọmi.
14:15 Bi kio u? Mio ri etin mẹn lerọmọn, sokpẹn mio gbo ri udu mẹn lerọmọn. Mio ri etin mẹn so io, mio gbo ri udu mẹn so io.
14:16 Si ọi ri iyọ, u kha re Oisẹlẹbua vbi etin, bi ọnọin ẹn emi kio meti gbi “Isẹ” sua khuẹnmi, si ọi ẹn emi nua ta?
14:17 Ọhiọ vbẹkẹ ata nu rẹ khuẹnmi, sokpẹn ọọha ọliọ ọi mọn akhuaere.
14:18 I khuẹnmi Oisẹlẹbua khi mia zẹ uro etin lẹ vbavba erẹmẹn.
14:19 Sokpẹn vbẹkẹ ọsẹ mio ta ikpeta ihẹn vbi amuẹokuere ni da meti ma eliọ lẹ ni zẹ uro ẹgbẹẹngbeẹn vbodigbe vbi uro etin.
14:20 Imiọn men, vba khai kiẹn ivbokhan vbi aoo. Nọ rio kha ri iyọ, vbẹkẹ emiọbe, ni vba rẹbi ivbiọmobọ. Sokpẹn vbi aoo, vba kiẹn ọohiae.
14:21 Ma viọin vbẹkẹ uhi, “Rẹshin oẹnmi ghi ere bi ukpobunu ghi ere ni rio teta ma eni eọha na.” “Ọ kha rẹ kha ri iyọ achẹ nain ria họn eta mẹn,” ọna ni Ebiain tae.
14;22 Ọhiọghọna uro ọdọdan u aẹẹn, ọi u ji enọ miehọn, sokpẹn rẹ ji enọin miehọn. Sokpẹn atakpotọe aẹẹn ọ, ọi u rẹ ji enọin miehọn, sokpẹn rẹ ji enọ miehọn.
14:23 Ọhiọghọna, ọsẹ erẹmẹn kha sikoko kha zẹ uro etin, bi eọha ni nain mọn iẹnmi kha ore, nan rio ta khi min vba mẹmẹn?
14:24 Sokpẹn vbavba erẹmẹn khaa ta atakpotọe ni ọnọin miehọn da ọnọ davbi oe ore, min udu ghọe ọ ri ibohi nain rẹshin emi erẹmẹn nọ họin. Emi erẹmẹn nan tae nọ ghaẹzọ ghọe.
14:25 Ma ri uhegbe ghi udu ghọe ma. Ebọ davbọ dianre nikhi mọn de sẹoru, bi mọn ga Oisẹlẹbua. Mọn tae gboogodo khi min Ọisẹlẹbua zukpe rivbi use ghovba.
Vba U Emi Erẹmẹn Ọsẹọsẹ
14:26 Bi ọ ki sọegbe, imiọn? Vba kha si egbe koko, ni ọdeọde mọn isam, amama, arẹma, azuro etin, da amiuro. Vba u emi erẹmẹn ni vba da khua ọsẹ re.
14:27 A kha min uan nọ zẹ uro etin, ni etueva da ọ kha bun gbe eha, ni otuọkpokpa vbi ọsẹọsẹ, ni uan ri azẹo ghi emi nan tae ma.
14:28 Sokpẹn si ai min uan nọ ri azẹo ghọe ma, ni nanain ọdeọde haakẹẹ vbẹkẹ ọsẹ. Ni ọdeọde nain teta ma egbọe ọkpa bi Oisẹlẹbua.
14:29 Ji iẹn eva da eha teta, ni eliọ daehọ bi udu ghi iẹnmi ji emi ni nain tae.
14:30 Sokpẹn a kha ri arẹma ma uan nọ dehae vbẹkẹ igami, ni ọnọ teta havbọ.
14:31 Min ọdeọde vba ọ meti ta atakpotọe ọkpọkpa nan da gare khi ọdeọde da mamemi bi ọmọin iriakhaa.
14:32 Ọhiọ etin ghi evba iẹn a rẹ shan obọ ghi eni iẹn nọ ri.
14:33 Ọhiọ Oisẹlẹbua ọi u Oisẹlẹbua ghi orughulabẹ, sokpẹn oghi ọfunre. Ọna nikhi uhi vbi ọsẹ erẹmẹn ghi enọ miehọn.
14:34 Ni ikhuoho havbọ vbẹkẹ ọsẹ. Ọhiọ ai ri ehe i nain rẹ teta. Nọ rio kha ri iyọ ni nain mọn idehọnmọnre, enibi uhi gbo nain tae.
14:35 A kha min ebi nan hoo ni nain mama, ni nain miẹn edọn nain vbi oa. Ọhiọ emi ẹkhọe ọ ni okhuoho da teta vbẹkẹ ọsẹ.
14:36 Min eta ghi Oisẹlẹbua davbi obọ vba vae? Vbavba ukpọkpani nọ sẹ de ọe egbe?
14:37 A kha min ọnọ o ọe negbọe khi oẹn da ọọha nọ von ji etin ni nọin u, nọ yanma khi emi ni vin ji vba u iyi ghi Ebiain.
14:38 Sokpẹn a kha min ọnọin ẹn ọna, nan khai ri ehe nain.
14:39 Ọhiọghọna, imiọn, ni vba zemi hoo ni vba da kha ta atakpotọe, vba khai khu uan vbi azẹ uro etin.
14:40 Sokpẹn vba u emi erẹmẹn nọsẹn vbi ọsẹọsẹ.