1 2 3 4 5
Rẹ Ji Ivbiẹ, Igbama Bi Enediọn
2:1 Ivbiẹ, mia vin ena ji vba ni vba khai u ọkhọọ. Sokpẹn, a kha min uan nọ u ọkhọọ, main mọin amiegui vbi odoghi Era, Ijesu Kristi, uan nọ uata.
2:2 Nọnọin nikhi iuọbo ghi ọkhọọ main, ọi u oghomain ọkpa, gbokhi oghi agbọn erẹmẹn.
2:3 Rẹshin ọna ni main rẹ ẹn khi main ẹn ọin, si main rẹ hivbi uhi ghọe.
2:4 Ọnọ tae khi, “I ẹn Oisẹlẹbua.” Sokpẹn ọi rẹ hivbi uhi ghọe, mọn ashan, ata i riọe.
2:5 Sokpẹn uankhuan nọ rẹ hivbi eta ghọe, vbẹkẹ ata, vbẹkẹ ọni uan ni ni ihọnmẹkẹ ghi Oisẹlẹbua da gha. Rẹshin ọna ni main rẹ ẹin khi main rivbi ẹkẹ egbe ghọe.
2:6 Uan nọ tae khi min nọ we vbẹkẹ Oisẹlẹbua, mọn eọvbọ nọ da kha gbo shan zẹn enibi Ijesu Kristi he shan.
2:7 Enayan, uhi nọgbọn kia vin ji vba, sokpẹn uhi ni gheghe ni vba mọin rẹ davbi isobọ vae ọ. Uhi ni gheghe nikhi eta ni vba họin.
2:8 Ọrẹriyọ mia vin uhi nọgbọn ji vba, nọ u ata vbẹkẹe Kristi bi vbẹkẹ vba erimidi min ebii kia rare, ọfuan ghi ata mọn kia vbae.
2:9 Uan nọ tae khi nọ rivbi ọfuan nọ zee ọmiọin rivbi ẹkẹ ebii rẹ si ẹghẹna re.
2:10 Ọnọ họnmẹkẹe omiọin rivbi ẹkẹ ọfuan, ehe ghi udegbagan ọi rivbọ jọe.
2:11 Sokpẹn ọnọ zee ọmiọin rivbi ẹkẹ ebii mọn gbo shan vbẹkẹ ebii, ọi ẹn ehe nọ lodẹ, erimidi ebii ruọe ẹo. ?
2:12 Mia vin ebe ji vba, ivbokhan mẹn ghi ọghain, erimidi ma ri ọkhọọ vba họnmọn vba vbọhiọ ghi ein ghọe.
2:13 Mia vin ebe ji vba, vbavba era, erimidi khi min vba ẹin ọnọ davbi isobọ vae. Mia vin ebe ji vbavba igbama erimidi khi min vba khuosho ghi uan ọbe ni. I vin ebe ji vba, ivbokhan ni guẹ erimidi khi vba ẹin Era.
2:14 I vin ebe ji vba, vbavba era, erimidi khi min vba ẹin ọnọ davbi isobọ vae. I vin ebe ji vba, igbama, erimidi khi min vba toto, bi eta ghi Ebiain rivbọ deba vba, bi min vba khuosho ghi ọọhọbe ni.
Vba Khai Họnmẹkẹe Ọni Otọe Agbọn Na
2:15 Vba khai mọn ihọnmẹkẹe ghi ọni otọe agbọn na da emi nọ rivbi ẹkẹ agbọn. A kha min uankhuan nọ họnmẹkẹe agbọn, ihọnmẹkẹe ghi Era ọi riọe.
2:16 Emi erẹmẹn nọ rivbi ẹkẹe agbọn —ahoo ghi egbe, ahoo ghi ẹo, bi ikhuaegbere ghi ẹwẹn agbọn —ọi u oghi Era sokpẹn oghi agbọn ọ.
2:17 Agbọn bi ahoo ghọe mọn rare. Sokpẹn ọnọ u awe ghi Oisẹlẹbua mọn kha rivbọ rẹsonẹnẹnẹ.
Ọnọ U Azọhan Ji Kristi Vade
2:18 Ivbokhan ni guẹ, ẹghẹ nọ kpehinmi nikhọna, Zẹn enibi vba he họin khi ọni azọhan ji Kristi vade, ẹghẹna evba azọhan ni bun vae. Ọna nọ zẹe ni vba da ẹn khi ẹghẹ ikpehinmi nikhọna.
2:19 Nain davbi use main dianre, sokpẹn nain davbi odo main dianre. Ọhiọ ọ kha u khi odo main ni nain da dianre, min nan khaa rivbọ deba main. Sokpẹn bi nain rẹ dianre, ọni rẹma khi nain davbi use main dianre.
2:20 Sokpẹn vba mọin izohẹn nọ davbi obọ ghi Ọnọ Fuan ni vae, vba gbo ẹn ata erẹmẹn.
2:21 I vin ebe ji vba erimidi khi ọi u khi vbai ẹn ata, sokpẹn erimidi khi vba ẹn ọin bi erimidi khi iashan i davbi ata vae.
2:22 Ọnikhi ọnọ ashan si ọi u ọnọ sẹin khi Ijesu ọi u Kristi? Ọni uan ni nikhi azọhan ghi Kristi, ọrẹrẹu khi mọn sẹn Era bi Ọmọn.
2:23 Ai min uan nọ sẹn Ọmọn nọ mọin Era. Uankhuan nọ yanma Ọmọn mọn mọin Era.
2:24 Rẹ ji vba, vba ji ebi vba họin rẹ davbi isobọ vae kha rivbọ deba vba. Ebi vba họin vbi isobọ kha rivbi ẹkẹ vba, min vba gbo kha rivbi ẹkẹe Ọmọn bi Era.
2:25 Ọna nikhi iruọmi nọ rẹ i main: agbọn ghi itẹtẹbitẹ.
2:26 I vin eni emina ji vba vbọhiọ enọ devbaodẹ.
Izohẹn Nọ Davbi Obọ Ghọe Vae
2:27 Rẹ ji vba, izohẹn ni vba mie davbi obọ ghọe vae rivbi egbe vba, bi vbai che mọn ahoo ni uan ma vba emi. Sokpẹn enibi izohẹn ghọe hia ma vba emi erẹmẹn khi ọ gbo u ata bi ọi u iashan, zẹn enibi ọ he ma vba, vba rivbi ẹkẹ ọe.
2:28 Ẹghẹna, ivokhan ghi ọghain, vba kha rivbi ẹkẹ ọẹ, nan da gare khi ọ kha ri egbe ma, min ma mọn izezudu, ẹkhọe rio gbo o main vbi odao ghọe vbi avae ghọe.
2:29 Vba kha ẹn khi mọn uata, vba ẹin khi ma vbiẹ uankhuan nọ u ebọ diae davbi obọ ghọe vae.